អភិបាលខេត្តព្រះសីហនុ គូសបញ្ជាក់ថា ខេត្តព្រះសីហនុមានកំណើនសេដ្ឋកិច្ច ៤ភាគរយ

ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ទទួលជំនួបសម្តែងការគួរសម និងពិភាក្សាការងារជាមួយលោកជំទាវ Flerida Ann Camille P.Mayo ឯកអគ្គរដ្ឋទូតវិសាមញ្ញ និងពេញសមត្ថភាពនៃស្ថានទូតសាធារណរដ្ឋហ្វីលីពីន ប្រចាំព្រះរាជាណាចក្រកម្ពុជា នៅសាលាខេត្តព្រះសីហនុ កាលពីរសៀលថ្ងៃអាទិត្យទី១០ ខែវិច្ឆិកា ឆ្នាំ២០២៤។

ក្នុងជំនួបនោះ ក្នុងនាមរដ្ឋបាលខេត្ត ប្រជាពលរដ្ឋខេត្តព្រះសីហនុ ឯកឧត្តមអភិបាលខេត្តសូមស្វាគមន៍ចំពោះលោកជំទាវឯកអគ្គរដ្ឋទូតហ្វីលីពីន មកកាន់ខេត្តតំបន់ឆ្នេររបស់យើង និងអបអរសាទខួបលើកទី៦៧ នៃទំនាក់ទំនងការទូតរវាងប្រទេស កម្ពុជា និងប្រទេសហ្វីលីពីន និងកិច្ចសហប្រតិបត្តិការក្នុងតំបន់។

ទន្ទឹមនឹងនេះ ឯកឧត្តមអភិបាលខេត្តបានជម្រាបជូនពីស្ថានភាពភូមិសាស្ត្ររបស់ខេត្តព្រះសីហនុ ជាខេត្តនៅទិសនារតីនៃប្រទេសកម្ពុជា ដែលមានសក្តានុពលខ្ពស់ផ្នែកសេដ្ឋកិច្ច សង្គម។ ខេត្តព្រះសីហនុ មានក្រុង-ស្រុកចំនួន៥ ២៩ឃុំ-សង្កាត់ ស្មើនឹង១១១ភូមិ នៅឆ្នាំ២០២៣ ខេត្តព្រះសីហនុមានកំណើនសេដ្ឋកិច្ច ៤ភាគរយ និង GDP សម្រាប់មនុស្សម្នាក់ ៦ ៨៨៣ដុល្លាអាមេរិក ជួយកាត់បន្ថយភាពក្រីក្រ។

 ខេត្តព្រះសីហនុមានធនធានធម្មជាតិដ៏សម្បុរបែប មានកោះតូច ធំចំនួន៣២ ថ្មប៉ប្រេះទឹក១ និងថ្មដុស៥ មានឆ្នេរសុមុទ្រប្រវែង ១៧៥គីឡូម៉ែត្រ មានធនធានធម្មជាតិលើគោក និងជីវចម្រុះបាតសមុទ្រ ដែលជាមូលដ្ឋានគ្រិះក្នុងការអភិវឌ្ឍសេដ្ឋកិច្ច និងសង្គម។ ខេត្តព្រះសីហនុជាខេត្តស្នូលនៃតំបន់ឆ្នេរសមុទ្រនៃខេត្តទាំង៤ មានដូចជា ខេត្តកោះកុង ព្រះសីហនុ កំពត និងខេត្តកែប ដែលហៅឈ្មោះតែមួយថា ឆ្នេរសមុទ្រកម្ពុជា ដើម្បីសម្រេចបានចក្ខុវិស័យខាងលើ រាជរដ្ឋាភិបាលកម្ពុជា បានកសាង

 និងអភិវឌ្ឍហេដ្ឋារចនាសម្ព័ន្ធផ្លូវថ្នល់ក្នុងក្រុងព្រះសីហនុ រង្វង់មូល និងរួបសំណាកចំនួន៤ ដោយមានការសាទរពីប្រជាពលរដ្ឋខេត្តព្រះសីហនុ ក៏ដូចប្រជាពលរដ្ឋនៅទូទាំងប្រទេសផងដែរ។ ខេត្តព្រះសីហនុ ជាច្រកចេញចូលអន្តរជាតិយ៉ាងសំខាន់សម្រាប់បង្កើនសេដ្ឋកិច្ចជាតិ មានផ្លូវគមនាគមន៍ដូចជា ផ្លូវទឹក ផ្លូវអាកាស និងផ្លូវគោក។ ផ្លូវទឹក កំពង់ផែអន្តរជាតិទឹកជ្រៅបច្ចុប្បន្នមានជម្រៅទឹក

 ១៣,៥០ម៉ែត្រ រាជរដ្ឋាភិបាលបាន និងកំពុងធ្វើការអភិវឌ្ឍកំពង់ផែជា៣ដំណាក់កាល ដោយដំណាក់កាលទី១ ពីឆ្នាំ២០២៤-២០២៦ មានជម្រៅទឹក១៤,៥០ម៉ែត្រ ដំណាក់កាលទី២ ឆ្នាំ២០២៥-២០២៨ មានជម្រៅទឹក១៦,៥០ម៉ែត្រ និងដំណាក់កាលពី៣ ឆ្នាំ២០២៦-២០២៩ មានជម្រៅទឹក១៧,៥០ម៉ែត្រ អាចឱ្យនាវាដែលមានចំណុះ១៦ម៉ឺនតោនចូលចតបាន។ ផ្លូវអាកាស ប្រភេទ 4E មានផ្លូវរត់ប្រវែង ៣

 ៣០០ម៉ែត្រ។ ផ្លូវគោក មានផ្លូវដែក ផ្លូវជាតិលេខ៣ លេខ៤ និងផ្លូវល្បឿនលឿនពីរាជធានីភ្នំពេញមកកាន់ខេត្តព្រះសីហនុ។ ខេត្តព្រះសីហនុមានតំបន់សេដ្ឋកិច្ចពិសេសចំនួន ៥កំពុងដំណើការ និង ១០ផ្សេងទៀតកំពុងសិក្សា ទន្ទឹមនោះ ខេត្តព្រះសីហនុ មានទឹកស្អាត និងអគ្គិសនីប្រើប្រាស់គ្រប់គ្រាន់សម្រាប់អ្នកទេសចរ និងការវិនិយោគផងដែរ។

ជាមួយគ្នានេះដែរ លោកជំទាវឯកអគ្គរដ្ឋទូតបានថ្លែងអំណគុណចំពោះរដ្ឋបាលខេត្តបានអនុញ្ញាតិឱ្យលោកជំទាវ និងសហការីបានចូលជួបសម្ដែងការគួសម និងពិភាក្សាការងារ ហើយដំណើរទស្សនកិច្ចរបស់លោកជំទាវនាពេលនេះ មានគោលបំណងផ្តល់សេវាកម្មសេវាកុងស៊ុលប្រទេសហ្វីលីពីនជូនដល់ប្រជាពលរដ្ឋហ្វីលីពីនដែលកំពុងបម្រើការងារនៅខេត្តព្រះសីហនុមានដូចជា គ្រូបង្រៀន វិស្វករ

 សាសនា និងការងារលើវិស័យផ្សេងៗ។ ក្នុងដំណើរទស្សនកិច្ចលើកក្រោយ យើងចង់ពិភាក្សារវាងសេនានុព័ន្ធយោធាប្រទេសហ្វីលីពីន ជាមួយនឹងមន្ទីរការងារខេត្តព្រះសីហនុ ដែលជាផ្នែកមួយនៃកិច្ចសហប្រតិបត្តិការសម្រាប់ប្រជាជនហ្វីលីពីន គោរពច្បាប់នៅកម្ពុជា។

ទន្ទឹមនោះ លោកជំទាវក៏ចង់ដឹងពីច្បាប់ស្តីពីការជួលជនបរទេសដែលមានវិជ្ជាជីវៈមកបម្រើការងារនៅខេត្តព្រះសីហនុ ដើម្បីជាផលប្រយោជន៍រួមសម្រាប់សហគមន៍ហ្វីលីពីនកំពុងធ្វើការស្នាក់នៅក្នុងខេត្តព្រះសីហនុមានប្រមាណជា៣០០នាក់ និងស្នើសុំឱ្យរដ្ឋបាលខេត្តព្រះសីហនុ សូមជួយផ្តល់ស្ថិតិប្រជាជនហ្វីលីពីនកំពុងស្នាក់នៅបម្រើការងារនៅក្នុងខេត្តព្រះសីហនុ ដើម្បីយើងមានមូលដ្ឋានក្នុងការគ្រប់គ្រងជួយដល់ពួកគាត់។

លោកជំទាវក៏បានថ្លែងអំណគុណរដ្ឋបាលខេត្តព្រះសីហនុ ដែលបានអន្តរាគមន៍ជួយប្រជាពលរដ្ឋហ្វីលីពីនចំនួន ៤០នាក់ ក្នុងកិច្ចសហប្រតិបត្តិការរវាងប្រទេសទាំងពីរ ដើម្បីប្រឆាំងឧក្រដ្ឋកម្មឆ្លងដែនដែលយើងបានចុះ MOU រវាងនគរបាលនៃប្រទេសទាំងពីរ ដើម្បីលើកទឹកចិត្តកិច្ចសហប្រតិបត្តិការក្នុងការប្រយុទ្ធប្រឆាំងឧក្រដ្ឋកម្មឆ្លងដែន ហើយស្ថានទូតហ្វីលីពីនក៏ចង់ធ្វើកិច្ចសហប្រតិបត្តិការជាមួយរដ្ឋបាលខេត្តព្រះសីហនុ ក្នុងការចូលរួមថែរក្សាបរិស្ថានសមុទ្ររវាងប្រទេសទាំងពីរផងដែរ៕ អត្ថបទ៖ AKP